المنسف الفلسطيني

[طريقة عمل المنسف الفلسطينى

طريقة عمل المنسف الفلسطينى او الفتية بالفلاحي

المقادير

1.لحم غنم حسب كل شخص شو نوع اللحم الى بفضله بس احسن شي لحم خروف وتكون الفخدة

2.كشك او لبن جامد او لبن عادي بس يكون حامض
3.رز
4. خبز شراك رقيق او خبز افغانى رقيق اذا الخبز العربي مش متوفر
5. راس بصل
6.وتومة
7. وزيت نباتى او سمن بلدي
بقدونس وصنوبر ولوز محمر للتزيين



طريقة الطبخ


اولا لازم اللحم ينغسل منيح بمي وملح
وبعدين بتقرط البصل شرايح كبار وبتحلوس مع السمن او الزيت
لبين ما يصير على صفار ويتذبل
بعد ما يتصفى اللحم من المي بنحط فوق البصل وبتحرك مع بعض لبين اللحم يبطل لونه احمر
وبعدين بنحط الكشك بعد ما نهرسه بالخلاطة فوق اللحم والبصل وبتحرك شوي وبنترك ليغلى
وبنضيف مي اذا لزم وشوية كركم من شان يعطي شوية لون
ولما يقرب اللحم يستوي بندق تومة مع شوية ملح حسب ملوحة الكشك او اللبن (بلاش تطلع الطبخة صرصور ملح ) وبنقدح التومة مع زيت وبنحطها فوق الشوربة واللحم
وطبعا بكون الرز مفلفل
وبنقطع الخبز (بنفته يعنى) في الصنية وبنصفي الشوربة فوق الخبز بالمصفاة
وبعد ما يتملا الخبز من الشوربة بنفهد الرز فوقهن وبنرتب اللحم في نص الصنية
وبعدين بنرش اللوز والصنوبر فوق الرز وعلى الطراف والبقدونس كمان
وبعدين اذا الرز او الخبز بكون ناشف بنحط في صحن شوربة
وبعدين صحتين وعافية
كيف بتحبوا توكلو بالمعلقة للمدنية او بالخمسة للفلاحين