يوميات مواطن طفران , 1

يوميات مواطن طفرات يعني أنا وأنت وأنتي وهم مواطن مش شايف قدامي يعني مش عاجبني أشيء من اللي بصير في هل الدنيا ...
الحلقة الأولى :
عائدون , عودة 2010
قبل كم يوم وانا ماشي في المخيم ... صحيح اسمو مخيم بس ولا الو دخل باللاجئين حجمو 100 متر انا بحس هيك بس بحكولي انو مساحته 22 دونم .. انا ما دخل راسي الحكي هاد المهم بعيدا عن المخيم بس انا بديت بالمخيم لانو بحكولنا المخيم بخص اللاجئين واللاجئين بس ... المهم اكمل موضوعي وانا ماشي شفت بوستر بجنن ملون ومزخرف وعليه بنات بيرقصن يعني اشي اغراء زي ما بيحكوا المهم بقرأ في هالبوستر الحلو الا هو شو يا ستي اسمعيني يا ستي ويا سيدي بحكيلك مهرجان العودة ... انا قرأت هالأسم وسطلت وزي ما كان يحكيلي عمي دايما لصمت يعني بطلت اجمع ..

ألعودة صار الها مهرجان وشو رقص وطبلة .. ع اساس انو هاد الحكي بدو يرجعنا بكرة ع حيفا ويافا وعكا وبدو يرجعني انا ع علار وصحابي ع راس ابو عمار وبيت جبرين و و و والقائمة اكثر من عدد الناس اللي بيسعهم المهرجان ، انا الفار صار يلعب في عبي لانو الحكي هاد مش مزبوط يا عالم احنا صار النا 62 سنة مرميين في المخيم بالآخر جايين يا حبايبي تعملوا مهرجان عشان تذكروا الناس بالعودة ؟ الحين تذكير الناس بالعودة بكون بالحفلات والاغاني ... ديروا بالكم انا مش اسلامي متشدد ولا بدعوا لمنع الناس من الاستماع للأغاني وحضور الحفلات انا مش من النوع ولا مع هالنوع بلاش تظلمونا وتظلموهم يمكن .
يعني فكركم يا ولاد عمي لو عملنا كم حفلة من هون وهون وجبنا فنانيين وفرق تراثية ودنيا ودين وغنينا للعودة ولحيفا يعني بنرجع .. أنا ما بكرهكم والله ولا بكره حفلاتكم بس عيب عليكم فوق ما بتعملوا حفلة بتحكوا انها عشان تخلي الناس يتمسكوا بالعودة وبالوطن وبتعملوا عليها تذكرة دخول وبدكوا تاخدوا فلوس من الناس ... على حساب هاي دعم للوطن ونوع من انواع المقاومة ... عجبا والله عجبا عجبا من الحضور وعجبا من المسؤولين وعجبا من كل الناس .. وعجبا من الفلسطينيين وعجبا من العودة هذه العودة الحديثة عودة 2010 .. عودة العصر الجديد ... إن كان رقصكم سيطول وغناءكم سيطول أيضا فلن أبقى أغني وأرقص معكم فلكلن منا طريقته في الرقص يا أحبائي.

طالعلك من حارتك طالعلك من بين ولادك طالعلك من جوا الشاي طالعلك وبحب اقولك بعد ما اطلعلك انو الثوابت ليست للبيع على غرار انو الفتاح مش للبيع


بين مدرجات جامعة بيت لحم تتألق البنات في مهرجان حق العودة الدولي " احلى شباب " وبين رمل وحصار غزة تعاني البنات من كل اشكال الخطر " مهي غزة شو دخلنا فيها فيه انفصال , على اساس انو احنا دولتين وحدة على الأرض والثانية على المريخ " مسافة كبيرة مهي اللي بتفصل بين صورة احتفالات مهرجان حق العودة في بيت لحم اللي قررت المرأه انها تحرر من مبادئها علشان تعبر عن الانتماء للوطن " انو وطن عزيزي ؟ "

في مدرجات الاحتفالات في مهرجان حق العودة بحب احكيلك عزيزي القارئ انو بحق للمرأه انو تسوي زي ما بدها .... ترقص وتغني مع أي فرقة بدها اياها برضو علشان تحافظ على انتمائها للوطن " برجع وبقلك انو وطن عزيزي ؟ عزة ولا الضفة ؟ "

اما تألق المراه في مدرجات حصار غزة هو اكيد تألق بنوع ثاني اكيد بدون خلاف واكيد انت متفق معي في الرأي !
لانو المراه في غزة بتكون واقفة وهي خايفة انها تكشف عن وجهها , لا نها سفيرة وطنها في الصمود والمقاومة وهي بتعرف شو يعني حق العودة ! وبتعرف كيف تعبر عن حريتها غصب عن الحصار والظلم الموجود لانو لحد الحين فيه معركة مع المرأه الغزاوية لانها بدها حريتها «ببطء تمنح المرأة الغزاوية الحماية»
بدي اسألكو سؤال صريح وواضح ! ماشي ؟
انت عزيزي الي بتقرأ في الاشيء المكتوب ! ايوة انت !
حق العودة بلزمو مهرجانات واحتفالات ؟ بلزمو ناس تنظر على القضية بس علشان يجمعو مصاري ؟
طيب خذ عندك , مهرجان حق العودة الدولي كلف 150,000 شيكل واكيد ربحو قد هذا الرقم مرتين !
فشو رايك عزيزي القارء في الاشيء اللي قرأتو الحين , شوية كلام طالع من مواطن طفران عايف الدنيا ومش عاجبو الوضع , بتعرف ليش مش عاجبني الوضع لاني ساكن في مخيم يعني بعرف شو يعني مهرجان حق العودة والضحك على الناس , بس الناس مبسوطة " هلا عمي هو فيه حد بفكر في القضية عمي انسى كلها ناس صارت تفكر بس كيف بدها تعيش , سياسات احتلال " ههههههههههه والله ذكرتوني في مهرجان فلسطين الدولي للرقص والموسيقى: كسر الحصار " كسرتو الحصار عمي وانتو تعزفو ؟ " بعرف انك بتقول علي اني بالع راديو بس ابصر انت فاهم ليش موجود اصلاً ؟!
بس بحب اقولكم زي ما قالها الشيخ امام قبلي شرفتم نيكسون بابا يا بتاع الاوتيرجيت عملولك ايمة وسيمة صلاطين الفول والزيت .....

مواطن طفران

منقول من مدونة لاجيء

يوميات واقعية

مشكور يا وديع وشكر لذكرك المصدر